بیٹھے صنم کدے میں ہم ، صوم و صلوٰۃ چھوڑ کر

بیٹھے صنم کدے میں ہم ، صوم و صلوٰۃ چھوڑ کر

کافرِ عشق ہو گئے ، رِشتہ بُتوں سے جوڑ کر

درد سے ہوں میں جاں بلب ، یہ بھی نہیں کیا خیال

کردیا خونِ آرزو ، چل دیئے منہ کو موڑ کر

جلوہءِ فتنہ ساز نے ، اُن کی نگاہِ ناز نے

عشق کی کائنات کو ، رکھ دیا جھنجھوڑ کر

آنکھ بھی خشک ہو گئی ، شعلہءِ غم بُجھائے کوئی

یاد کسی کی لے گئی ، دِل کا لہو نچوڑ کر

لاؤں کہاں سے اے فنا ، سجدہ حرم کے واسطے 

آج صنم کدے سے میں ، اُٹھا ہوں سر کو پھوڑ کر

انتخاب: اسدمحمود